#ТрэцяяЛінія, верасень 2018
Усё самае цікавае, што адбылося на будпляцоўках Трэцяй Лініі Мінскага Метрапалітэна ў верасні — у гэтым артыкуле.
Ст. Юбілейная Плошча
У тупіках Юбілейнай Плошчы ідзе перафарміраванне будпляцоўкі — адкрыўся тратуар уздоўж тупікоў, але закрылася паркоўка каля Адміністрацыі Цэнтральнага Раёна — там будуецца венткамера.
На самой станцыі — актыўныя работы па гідраізаляцыі. Дзеля гэтага тут прымяняюцца замежныя тэхналогіі — прынамсі, чэскія і швецарскія. Таксама паціху фарміруецца аблічча станцыі — на фота можна пабачыць калоны з арматуры.
Па плане да Еўрапейскіх Гульняў плануецца ўзвесці 3 з 6 узроўняў станцыі, а да канца 2019-га — перакрыць яе грунтам.
Ст.Плошча Францішка Багушэвіча
Ужо некалькі месяцаў гэта станцыя з’яўляецца самай шматлюднай — зараз тут працуе больш за 140 працоўных у змену. Найбольш актыўна тут вядуцца маналітныя работы. Плануецца, што ў лістападзе станцыю збольшага закапаюць.
Сама станцыя будзе чатырохпавярховая.
Ст.Вакзальная
Пакуль што на гэтай станцыі ідзе мантаж травалатараў і эскалатараў, а таксама вядуцца працы па будаўніцтве тунэляў у месцы старту Алесі ў бок Юбілейнай Плошчы. Актыўная фаза аздобных работ на станцыі пачнецца ў сакавіку.
Побач са станцыяй працягваецца актыўнае будаўніцтва паркінгу і гандлёвага цэнтру.
Алеся
Самая цікавая навіна гэтых дзён — Алеся прыпынілася ля сховішча Нацбанку. Паўза доўжыцца ўжо каля чатырох месяцаў, пройдзена каля 300 м з 1200 м. Магчыма, ёсць праблема з рэжучымі элементамі і патрэбна пазачарговае тэхабслугоўванне.
Ст. Кавальская Слабада
На станцыі з самай вялікай ступеняй гатоўнасці людзей няшмат. Гэта лёгка тлумачыць кіраўнік УП “Мінскметрабуд” Леанід Стухальскі — чыставое аздабленне можна хутка зрабіць перад самым пускам.
Работы на гэтай станцыі таксама стрымлівае неправедзены дагэтуль тэндэр на пастаўку станцыйных дзвярэй. Таксама, па словах Стухальскага, Гордарбуд павінен папрацаваць на паверхні і ў лістападзе запусціць нармальны дарожны рух. Але поўнасцю аднавіць скрыжаванне пакуль не атрымаецца — дэмантажная камера будзе раскрытая, пакуль Алеся не скончыць праходку.
Ліфт у пераход станцыі будзе сумешчаны з лесвіцай пад адным казырком.
Ст.Аэрадромная / ст. Немаршанскі Сад / ст. Слуцкі Гасцінец / электрадэпо Слуцкае
На ўсіх будпляцоўках ажыццяўляецца перакладка разнастайных інжынерных сетак, падрыхтоўка аб’язных дарог і пешаходных сувязяў, а таксама будаўніцтва новага пуцеправода ў раёне бальніцы хуткай дапамогі.
Правы тунэль з Кавальскай Слабады да Аэрадромнай плануецца скончыць у кастрычніку-лістападзе (пройдзена ~340м/400м), левы — снежань-студзень.
Па вул. Кіжаватава ад скрыжавання з вул.Асіповіцкай да скрыжавання з вул.Каржанеўскага з боку завода спілілі ўсе дрэвы і робяць часовы аб’езд — магчыма, пад будпляцоўку тунэлю Немаршанскі Сад-Слуцкі Гасцінец.
Іншыя навіны
У агульны доступ быў выкладзены дакумент “Отчет оценки воздействия на окружающую среду объекта «Второй участок третьей линии Минского метрополитена»”. Дакумент ужо састарэлы, але з яго можна было даведацца наступнае:
- Траса другой чаргі лініі будзе праходзіць пад вул. Мельникайтэ, праспектам Машэрава, вул. Багдановіча, вул. Шырокай, Лагойскім трактам;
- У праекце закладзена перспектыва на будаўніцтва двухузроўневай развязкі на плошчы Бангалор;
- Таксама па праекце пераход з трэцяй лініі на чацвёртую на ст.Парк Дружбы Народаў будзе ажыццяўляцца праз тунэль, а ў адваротны бок — праз вестыбюль;
- Участак будзе будавацца і механізаванымі, і немеханізаванымі праходчымі комплексамі;
- Параметры участку:
- 7 станцый
- 8.55 км экспл. даўжыня
- даўжыня платформы 106 м; - Агульны кошт будаўніцтва — 2 186 657 тыс. руб.
Таксама прайшло грамадскае абмеркаванне дакумента, па выніках якога стала зразумела, што праект другой чаргі яшчэ не гатовы, а ў Парку Дружбы Народаў, магчыма, высякуць некалькі дрэваў.
На гэтым усё!
Дзякуй вялікі за ўвагу! Калі Вы заўважылі нейкія памылкі ці недакладнасці, калі ласка — напішыце ў твітар https://twitter.com/metro_3d_line
