#ТрэцяяЛінія, снежань 2018
Апошні месяц 2018-га быў багаты на навіны з будпляцовак Мінскметрабуду. Разбярэм усе з іх па парадку.
Ст.м. Юбілейная Плошча
Згодна з апошнімі аэраздымкамі, вуліца Мельнікайтэ ўсё яшчэ раскапана.
З самой станцыі ў снежні з’явілася шмат навін. Па-першае — гэта вялікі артыкул пра гідраізаляцыю. З асноўнага:
- комплекс гідраізаляцыі такога тыпу ўпершыню прымяняецца ў Мінску;
- тры ступені абароны;
- выкарыстоўваецца сістэма ін’ецыравання месцаў магчымых працёкаў.
Па-другое — станцыя пачала расці. Паціху бетануюць калоны, платформу, лесвіцы.
Адну з калон, верагодна, няправільна забетанавалі і прыйшлося спілоўваць і вынімаць.
Ст.м. Плошча Францішка Багушэвіча
Апошнія аэраздымкі паказваюць, што цалкам гатовы заходні выхад і ёсць аснова пад паўднёвы. Астатнія будуць рабіць пасля пераносу руху. Таксама завяршаецца гідраізаляцыя, працягваецца мантаж павільёнаў заходняга выхада.
Поўнае аднаўленне руху па плошчы чакаецца ў трэцім-чацвертым квартале 2019-га.
Згодна з адказам на зварот чытача форуму, перабудову дарожнага руху плануецца выканаць да 30.05.2019, а поўнае аднаўленне дарожнага руху па плошчы — да 30.06.2020.
Ст.м. Вакзальная
Нешта цікавае адбываецца і тут. На месцы старту Алесі на поўнач ўжо праклалі тунэлі адкрытым спосабам і зусім хутка засыплюць. Паркінгу пабудавалі другі паверх.
Алеся
Алеся аднавіла праходку і зараз працуе ў нармальным рэжыме. Па апошніх дадзеных, пройдзена больш за 357м/1220м. Хуткасць — 12 метраў у суткі, што крыху павольней за норму. Нагадаем, што плануецца яшчэ мінімум два тэхнічных прыпынка.
Ст.м. Кавальская Слабада
Па словах намесніка галоўнага інжынера СМУ-2 Уладзіміра Доўгаля, гатоўнасць станцыі складае 95%. Усе чыставыя работы і мантаж складаных сістэм(сувязі, ліфты і г.д.) пакінуты на перадпускавы перыяд. На станцыі працуе няшмат людзей, каля 50, іх асноўная работа — аздабленне і мантаж канструкцый(напрыклад, павільёнаў).
На станцыі поўнасцю завершаны тупікі, сумешчаная цягава-паніжальная падстанцыя.
Ст.м. Аэрадромная, ст.м. Немаршанскі Сад, ст.м. Слуцкі Гасцінец
Па леваму тунэлю ручным шчытом пройдзена 366м/400м, хуткасць — 1–2 метра ў суткі, што даволі стандартна.
Па праваму тунэлю праходка завершана, але інфармацыі па дэмантажу няма.
Каля станцыі Аэрадромная поўнасцю знесены авіярамонтны завод, нядаўна з дапамогай верталётаў МНС адтуль “выцягнулі” два самалеты. Але будаўніцтва катлавана пакуль не пачыналася.
Наконт станцый Немаршанскі Сад, Слуцкі Гасцінец і электрадэпо Слуцкае новай інфармацыі няма — только тое, што падчас Еўрагульняў будаўніцтва весціся не будзе. Хутчэй за ўсё, гэта закране ўсе аб’екты Мінскметрабуду. Але амаль поўнасцю гатовы кароткі ўчастак тунэляў у электрадэпо каля АўтаВазу.
Іншыя навіны
Ня ў першы раз у навінах сказалі, што тэрмін сдачы першай чаргі трэцяй лініі — лістапад 2020. Хутчэй за ўсе, гэта будзе 7 лістапада.
Таксама з’явілася шмат якасных фота новых цягнікоў Stadler.
З’явіўся 3D-праект станцыі Парк Дружбы Народаў/Плошча Бангалор.
8 снежня памёр архітэктар Уладзімір Целяпнёў. Амаль усе станцыі Мінскага метрапалітэна, пабудаваныя пасля 1991 года — яго праца.
На гэтым усё!
Дзякуй вялікі за ўвагу! Калі Вы заўважылі нейкія памылкі ці недакладнасці, калі ласка — напішыце ў твітар https://twitter.com/metro_3d_line
