#ТрэцяяЛінія, люты — кастрычнік 2022
Прайшла большая частка 2022-га — час рабіць новы агляд.
Ст.м. Аэрадромная
Найбольш гатовая на дадзены момант станцыя ўвайшла ў найменш цікавы этап будаўніцтва — калі работы багата і яна важная (абсталяванне, аздабленне і г.д.), але на працягу доўгага часу візуальна мяняецца няшмат.
Пачнем з паверхні. Вельмі павольна ідзе допраўпарадкаванне, асноўныя работы ідуць на скрыжаванні праспекта Міру і вуліцы Ніколы Тэслы. Зараз з боку дамоў Хваля і Сочы ўжо пакладзены асфальт, зроблены тратуары, якія падходзяць пад паўночныя выхады з падземнага пераходу. Але за гэта актыўна ўзяліся толькі ў верасні-кастрычніку, большую частку года сітуацыя там была як на першым фота ніжэй. Падобна на тое, што хутка ўсё ж такі адкрыюць скразны праезд па вуліцы Ніколы Тэсла.
Праца над павільёнамі выхадаў пакуль стаіць — “казыркі” рабіць не пачыналі, ёсць толькі бетонная лесвіца,шахта ліфту і на некаторых выхадах — спуск пад эскалатар. Па досведзе ранейшага будаўніцтва, дах пачнуць рабіць на завяршальным этапе будаўніцтва станцыі.
У паўночным вестыбюлі завяршаецца ўкладка граніту на падлогу. Працягваецца чыставое аздабленне. Практычна ўсе службовыя памяшканні на станцыі ўжо завершаны: абліцоўванне, шпатлёўка, афарбоўка, стаяць дзверы.
Адзін з выхадаў з гэтага вестыбюлю (а дакладней — з падземнага пераходу) будзе ўбудаваны ў будуючыся зараз побач Avia Mall.
Паўдневы вестыбюль таксама працягвае аздабляцца, хоць і работы пачаліся тут крыху пазней. Набор работ такі ж самы — укладка граніту, абліцоўванне, шпатлёўка, афарбоўка.
На станцыі працягваецца аздабленне і электрамантажныя работы. Манціруецца абсталяванне. На платформе пачалі класці граніт. Глыбіня станцыі — 12–15 метраў.
У тунэлях са станцыі ідуць работы над верхнім збудаваннем шляху — укладваецца бетонная аснова, блокі, ідзе рэйказварка.
Алеся
Комплекс завяршыў праходку тунэлю ў бок Немаршанскага Саду. 28 лютага заставалася прайсці толькі 80 метраў, а ўжо 10 сакавіка адбылася збойка. Алеся завяршыла тунэль адлегласцю 1828 метраў.
Зараз комплекс адправіўся на рамонт і кансервацыю. Звонку комплекс пафарбавалі. Выканалі антыкаразійную перадафарбоўчую апрацоўку тэхналагічных калясак Унутраныя паверхні комплексу чысцяць ад бетонных адкладаў. Паралельна праводзілася рэвізія і дэфектоўка: спецыялісты ацэньвалі, што яшчэ неабходна адрамантаваць ці замяніць.
Ст.м. Немаршанскі Сад
Прамежкавая ва ўсіх сэнсах станцыя працягвае актыўна будавацца і гэта заўважна.
На паверхні актыўна вядзецца абратная засыпка і нават прагледжваецца фарміраванне новага скрыжавання вуліц Асіповіцкай і Кіжаватава. Яго абяцалі яшчэ ў пачатку года, для будаўніцтва выхадаў. Мабыць, да канца года будзе гатова.
Адно з яшчэ раскрытых месцаў — дэмантажная камера на поўначы станцыі. там вядуцца маналітныя работы па злучэнні тунэляў і станцыі.
У вестыбюлі (ён тут адзін, па цэнтры) паціху пачынаюцца аздабленчыя работы.
На самой станцыі завяршаюцца маналітныя работы. Затрымка тут была звязана з пераносам цеплатрасы, з-за якой станцыю будавалі часткамі. У астатнім — вядуцца аздабленчыя работы, у асноўным тынкаванне, а таксама складванне перагародак у службовых памяшканнях. Вядзецца і падрыхтоўка да мантажу абсталявання.
Канструкцыя станцыі будзе нагадваць Плошчу Францішка Багушэвіча — праект, які быў апрабіраваны яшчэ на Міхалова і так спадабаўся Мінскметрапраекту за сваю кампактнасць і адносную таннасць.
Глыбіня станцыі — 16 метраў.
Ст.м. Слуцкі Гасцінец
Спачатку трэба распавесці пра тунэлі да станцыі, якія будаваліся часткова адкрытым спосабам, часткова закрытым.
Для Мінска гэтыя тунэлі — унікальныя, з-за з’езду ў электрадэпо. Пасля Немаршанскага Саду тунэлі ў дэпо ідуць на ўзровень вышэй і паварочваюць у бок, а тунэлі да Слуцкага Гасцінцу ідуць прама. Асаблівасць у тым, што тунэлі ў дэпо на пэўнай дзялянцы ідуць непасрэдна над тунэлямі на станцыю — у адным катлаване пабудавалі чатыры тунэлі. Зараз маналітныя работы завершаны. На паверхні працягваецца абратная засыпка і фарміраванне вуліцы Кіжаватава
А зараз пра станцыю, менавіта з-за якой адкрыццё новага ўчастку можа затрымацца.
Тут ідуць амаль усе магчымыя работы адначасова: і забіўка шпунтавых паляў, і распрацоўка катлавану, і маналітныя работы, дзе магчыма (ужо траціну зрабілі). Невялікую дзялянку нават паспелі засыпаць.
Вядома, ні пра якое аздабленне тут казаць пакуль нельга — яшчэ не разрабілі нават катлаван пад вестыбюль(ён тут адзін, каля скрыжавання Кіжаватава/Сярова, але не пад ім) і выхады.
Электрадэпо Слуцкае
Электрадэпо — гэта наогул адно вялікае ўражанне ад усяго будаўніцтва гэтай чаргі. Ад самага пачатку будаўніцтва падаўжэння работы там амаль не вяліся. Але пачынаючы з мінулага года яны рэактыўна паскорыліся. Агулам, ад Мінскметрабуду такога ніхто не чакаў :)
У маналіце і металаканструкцыях ужо ўзводзяцца: адстойна-рамонтны корпус з вытворчымі майстэрнямі на 12 канаў (з перспектывай пашырэння да 27), пост электрычнай цэнтралізацыі, СТПд(хто ведае, што гэта — напішые ў твітар) з кампрэсарнай і збудаваннем ГА, а таксама памяшканні для мыйкі і афарбоўкі рухомага складу. На стадыі праектавання знаходзіцца сяміпавярховы адміністрацыйны-бытавы комплекс.
Акрамя гэтага вядуцца работы па перакладцы інжынерных сетак, уладкоўваюцца шляхі для цягнікоў.
Іншыя навіны
11 лютага на будпляцоўцы станцыі Немаршанскі Сад загінуў чалавек — супрацоўніка аднаго з БУ засыпала грунтам.
На плошчы Бангалор у красавіку пачаліся работы па перакладцы камунікацый пад будаўніцтва метро.
У Мінскметрабуда новы кіраўнік — замест Леаніда Стухальскага арганізацыю ўзначаліў Васіль Касовец, большую частку сваёй кар’еры ён правёў у “Мінскбудзе” і МАПІДзе.
Мінскі метрапалітэн планіруе закупіць 19 новых саставаў пад падаўжэнне трэцяй лініі і абнаўленне рухомага складу на першых двух. 12 саставаў будзе пяцівагоннымі, 7 — чатырохвагоннымі.
Старшыня Мінгарвыканкама Уладзімір Кухараў наведаў будпляцоўкі трэцяй лініі. Там яму сказалі, што гатоўнасць усёй чаргі каля 50%, на што чыноўнік адказаў, што на працягу двух гадоў будаўніцтва завершыцца і станцыі ўвядуць у эксплуатацыю. Выглядае, канечне, сумнеўна — за чатыры гады зрабілі 50% (калі лічыць з 2018-га), а за два — зробяць яшчэ 50%. Больш рэальным, канешне, выглядае здача дзесьці у першым-другім квартале 2024, але паглядзім.
З’явіліся новыя рэндары станцый Пярэспа і Плошча Дружбы Народаў з невялікімі анатацыямі. Можна заўважыць, што падземных пераходаў праз вуліцу Сурганава не запланавана. Магчыма, іх будаўніцтва адклалі на станцыю Плошча Бангалор чацвёртай лініі?
У жнівеньскім рэпартажы АНТ галоўны інжэнер Мінскметрапраекту Рыгор Пратасаў, адказваючы на пытанне пра станцыі трэцяй лініі на поўначы, сказаў, што пасля станцыі Парк Дружбы Народаў падаўжэнне лініі плануецца ў Зялёны Луг яшчэ трыма станцыямі — Івана Мележа, Зялёны Луг, Лагойская. Падаўжэнне ў Паўночны бераг усё ж такі адмяняецца?
На гэтым усё!
Дзякуй вялікі за ўвагу! Калі Вы заўважылі нейкія памылкі ці недакладнасці, калі ласка — напішыце ў твітар https://twitter.com/metro_3d_line
